NASA CEO to be charged over vandalism

Kakobarasta serkali kole makoiyoni keyai kambagoshek eng kwen nebo taonishekab Nairobi, Kisumu ak Mombasa.

Kamwa minister nebo ribetab kalyet eng emet orit Dr .Fred Matiangi kole kaib kokwoutionotok ko oret akeenge ne tokchinigei kokirinda youtik chebo ng’emetab tuguk koboto malik chebo bik ak chemungarainik chekokibaoryonchi eng kambagoshek chebo NASA.

Kong’ololchin sirikab logoiywek eng sang nebo gotab Harambee House eng taonitab Nairobi, komwa Matiangi kole maiyoni serkali kotestai ng’emetab malik chebo bik eng kasarta nebo kambagoshekab NASA.

Kamwa Matiangi kole tetat kirwokchi CEO nebo NASA Norman Magaya kosupgei ak ngemishet neo nebo malik nekobit eng taonishekab Nairobi ak Kisumu eng mwaet kole inendet nekichengei chomchinet anan permit nebo kambagoshechatak ak kou notok ko nyolu kerirtae inendet kosupgei ak ngemishonotok.

Kabit nito eng kasarta ne tetat koyai kambaget age kipakengeitab NASA eng betutab mutai komochei keyai walet eng kipakengeitab lewenishet nebo IEBC kotomo keyai lewenishet nelel nebo President.

Kates komwa Matiangi kole nganda iyanat eng ngotutikab emoni eng chi age tugul koyai kambaget, ko makat kosuldae kambagonatak eng oret nebo kalyet asimachutyi poishonik chebo bikab emet chemotinyegei ak kambagonatak

Kapoishe kasaratak Matiangi kokoito koyomiset eng bikab emoni kole chobot serkali korib kalyet eng emet missing ko eng kasari tesetai terchinoshek chetinyegei ak lewenishet nelel nebo President.