Miguna Miguna still being held by State

Magat kiitita kapkirwok eng raini ogilyot Miguna Miguna kosupgei ak nekokon ngatutionoto kapkirwok nebo High Court ole kokangat kora kitykata inendet kobaten maimugak ak  tesetai kokerat eng kiwanjetab ndegeisiek nebo JKIA.

Kongat kirwokindet Lady Justice Roselyn Aburili kole kityakta Miguna eng chokchinet eng kiwanjetab ndegeisiek nebo JKIA kobaten makisuldaen ngatutionoto ak kou noto kigeni asikeker ankot kiitoi inendet kapkirwok eng raini.

Koit komalchi ogilyekab Miguna chekaindochini James Orengo ngotutionotok eng kurgotik chebo ofisishekab Immigration amu komamitei ofisaiyat age tugul nekotaach ngotutionotok kokon kapkirwok nebo High court.

Kawo kapkirwok Miguna komochei kirwokchi serkalitab emoni kosupgei ak nemaiyan kochomchi inendet kochut emoni ole kaikoito somet eng kapkirwok ogilyekchi cheboto Nelson Havi, John Khaminwa ak Julie Soweto, kongat serkalitab Kenya koisto kanogutik tugul chekoikochi inendet ak kechomchi kochut emenyi nekikisikchini.

Mochei kora ogilyechotok kekirinda serkali komatkosuldae tetutik alak tugul chetokchinigei kimut Miguna eng kimnotet komanda sang nebo emoni

Akot kou noto ko kamwa Miguna Miguna eng logoiyot kole tesetai kobunei ine nyalilda ne o eng kasarta netesetai kokerat eng got agenge nekokikerchi eng kiwanjanoto bo ndegeisiek eng nekamwa kole tomo konyor ine tugukab komonut chebo komonut cheboto amitwogik ak tuguk alak.

Akot kou noto kotomo kenai imanitab ngalaletab Miguna kosupgei ak netomo konyor sirikab logoiwek poroindo nebo koitita eng goato kokikerchi Miguna.