MCAs’ set to get 11B car grant

 

Mitei kamugetab kikoch MCA age tugul eng emoni rabinik Million 5 chepoisien eng aletab karishek anan Car Grant.

Kabit nito yekongomwa Deputy President William Ruto kole chobot serkali kokoch kasubet somet kobun MCAs nebo konyor rabinikchatak angotkosirto bunge.

Kongololi eng tuiyetab Annual Legislative Summit netesetai eng taonitab Mombasa,komwa Ruto kole magat kobit kerkerindo eng kwenutab MPs, Senators ak MCAs.

Kokon ngalalanatak Ruto kotinygei ak kurset nekokon MCAs eng tuiyonoto kole nyalu kikoch icheget kelchinoik chekergei ak chenyoru MPs ak Senators amu yoei poishonik chekergei.

Komwa MCA nebo Shanzu Maimuna Salim kole mokchinigei MCAs rabinik cheoleen karishek anan Car Grants ak legutab bandaptai nekergei ak CDF asi komuch kosuldae poishonikwai kou ole magat.

Akot kou noto ko komwa kandoindetab chechang eng Senate Kipchumba Murkomen kole imuch ketoi legut nekipoisien eng ibunetab bandaptai eng Wardishek eng konegit akot eng kasarta nekosom MCAs kokilchigei poishonikwai.

Kokotoi Senator nebo Muranga Irungu Kang’ata Billit netokchinigei kitaban chepkondok chesirei Billion 21 eng legutab Ward Development Fund ole kikeni keker angotkisirtoi Bill noto.

Kikotestai kokon kasimchinet MCAs chebo emoni ketoi legutab bandaptai eng Wardishek ole kikon kamuiset eng arawet konye kole bendi kotononi poishonik tugul angotkomakikosyi rirekwai.