Kayai kambaget bokolushekab biikab emet eng ortinwekab Nairobi konerekchini yautik chebo nametab asoya

Kayai kambaget bokolushekab biikab emet eng ortinwekab Nairobi konerekchini yautik chebo nametab asoya chekokotestai kobit eng serkali missing eng kipagengeitab neranik nebo NYS.

Kondochini Wanjeru Nderu neborchingei imandab kipkosobei, ko kaikoito Petition biikchoto eng ofisitab President komochei keib kakwoutik chekimen kitonon yautikchoto bo nametab asoya.

Mochei biikchoto eng Petition inoto koistogei eng poishet ofisaek chetelelchini Ministries cheterter chekikemwaitae nametab asoya ak yautik alak chemanyalu.

Mochei kora biikchoto eng Petition nengwai kerat biik chekinyorchini lelutiet nebo nametab asoya ak kiweek rabinik ak maliik chekichor biikchoto.

Kotinygei ak benkishek chekikonor chepkondok chekikichor eng kipagengeitab NYS ak kipagengeishek chebo serkali,komwa bikchoto kole magat keyai chikilishet neititaat eng benkishekchoto ak keipchi kakwoutik chekimen benkishek chekinyorchini lelut.

Katoigei kambaganatak eng kebeberta nebo Freedom Corner eng Uhuru Park ak kotokchigei oretab Kenyatta Avenue, Kimathi Street, City Hall Avenue, Parliament Road ak kowongei eng ofisitab President nemitei Harambee Avenue.

Eng sang nebo kurkotik chekichuten bunge,ko katiem biikchoto kokoito Petition age eng bunge kobate maimuch kokoito kosupkei ak nekaesio kotaach Petition inoto MP nebo Nyali Mohammed Ali nekemongei komochei kongololchi biikchoto.

Kabit nito eng kasarta nekotestai kirwogetab biik 20 chekibwotchini kele kitinygei ak chorsetab rabinikab NYS ole kerotin eng Remand kogeni tilet netetat kekon eng Tarik 5 arawetab 6 kotinygei ak angotkitioktoi icheget eng bail.

Ends////