Kakoesio kandoindetab Wiper kurset kobun alak eng kandoikab Nasa kole koib poroindo nebo kandoindetab Upinzani

Kakoesio kandoindetab Wiper Kalonzo Musyoka kurset kobun alak eng kandoikab Nasa kole koib poroindo nebo kandoindetab Upinzani amu kokometo poroinoto Raila Odinga kosupkei ak nekiigatgei ak President Uhuru Kenyatta ak kotil kopois eng kipagenge.

Kongololi eng sautikab Jumapili chekakiyai eng kanisetab AIC Athi River,komwa Kalonzo kole tomo kobutok katuiyetabgei nebo Nasa ako takondochini katuiyonoto Raila eng mwaet kole tomo kobeet kimnotet Nasa amu kotil Raila kopois ak President Kenyatta.

Kawolu Kalonzo kurset nekanyor kobun kandoik alak chebo Opposition cheboto MP nebo Lugari Ayub Savula ak MP nebo Matungulu Stephen Mule chekamwoch Kalonzo koib poroinoto eng chokchinet amu kokotook kole kokochut serkali Raila.

Akot kou noto komwa Kalonzo kole nyalu kikoch poroindo Raila ak Uhuru kotuiyo biikab emet.

Kabotogei Kalonzo ak kandoik alak cheboto kandoindetab chamaitab ANC Musalia Mudavadi ak Senator nebo Bungoma Moses Wetangula chekaikimit kole magat keyai ngalalet neo eng emet asi keisto kaimutik chekikoityi emoni.

Kaikoito somet Mudavadi eng President Kenyatta koker kole kakinam biik tugul chekokotestai kochor rabinikab serkali ak kirwokchi.

Kaikoch kasubet ngalalanatak kandoik cheboto Governor nebo Makueni Kivutha Kibwana, neki Senator nebo Machakos Johnson Muthama ak kandoik alak chekamwa kole magat kitonon nametab asoya eng emoni ak kikoch kerkongiet nengwan biik chetinyegei ak yautikchoto.