Kakomwa police kole kokekanapta ribsetab kalyet eng kebeberta nebo North Eastern ak komoswek chebo Pwani

Kakomwa police kole kokekanapta ribsetab kalyet eng kebeberta nebo North Eastern ak komoswek chebo pwani nebo emoni kosupgei ak logoiwek chemwoe kole tetei kiboryotinikab Al Shabaab kosuldaen kabokchinosiek eng kasarta nekitokyingei igortab Eid ul Fitr eng kasitab mut

Kosupgei ak ngololindetab police Charles Owino ko kokiyokto ribiikab kalyet chetesunotin eng komosta nebo Witu, Mpeketoni ak kebeberwek alak chebo county nebo Lamu kosupgei ak nekamwa kole kokoyumgei kiboryotinikab Al Shabaab eng osnetab Boni.

Kosupgei ak Owino ko kiboryotinikchoto mitei kounyegei eng osnetab Boni kondochin biik aengu choto ko Maalim Ayman ak  Mohamed Bilaal

Akot kou noto ko kamwa police kole manyolu eng biikab emet kosich koyweisiet agetukul kosupgei ak nemitei barak ribsetab kalyet eng komosatak ak kiwatosiek tugul chebo emoni chetetegei ak emetab Somalia

Kasom kora police biikab emet kokoito logoiwek alak tugul chetinyegei ak chelesosnatet koityi afisaekab ribsetab kalyet asikimuch kekirinda kabokchinosiek.