Kakowirta kapkirwok nebo Court of Appeal kirwoget nekotokchinigei koesho lewenetab Governor nebo Kisumu County

Kakowirta kapkirwok nebo Court of Appeal kirwoget nekotokchinigei koesho lewenetab Governor nebo Kisumu county Prof. Peter Anyang Nyongo

Katil kirwokindet nebo kapkirwok inotok Justice Phillip Waki kole kikilewen Anyang Nyongo eng oret netokunot ole kaesho appeal nekiikoito eng kapkirwok inotok neki Governor nebo Kisumu Jack Ranguma koeshoi wolutikab lewenishet chekiibor kole kikibelis Nyongo

Komochei Ranguma kewirta tilet nekikon eng tai kapkirwok nebo High Court kole kiibelis Anyang Nyongo eng oret netokunot ak nenomegei ak ngotutik

Katil Justice Phillip Waki kole malel kirwokindet nebo High Court Justice David Majanja yekingoesho sometab Ranguma nekimochei keketyigei koitishetab kura eng mwaet kole kikilewen Anyang Nyongo eng oret netokunot ak kou notok komomitei amunee keyat sondukushek chebo biretab kura anan ballot boxes asikeit kuraishek kokeny

Kaiyan tilanatak Ranguma ole kamwochi kasubikchi eng sang nebo kapkirwok kole mokchini kit age tugul nemie Governor Nyongo eng kasarta neindochini county nebo Kisumu ko Governor