Kakoitita neki President nebo emetab America Barrack Obama kiwanjetab ndegeishek nebo Kisumu

Kakoitita neki President nebo emetab America Barrack Obama kiwanjetab ndegeishek nebo Kisumu International Airport ole wendi kokwetab Kogelo eng County nebo Siayaasi koyaat sukulitab musoknotet nebo Sauti Kuu Vocational Training Centre nekitau tupchenyi Dr Auma Obama.

Kachorgeei ndegeit nekaimuti Obama eng kiwanjanatak eng negit sait oeng ak kebeberiat nebo karon ole mitei oret kotokchinigei kokwetab Kogelo eng igoratak.

Mitei barak kogenishet eng kokwetab Kogelo eng County nebo Siaya eng kasarta netetat korutechi kokwonoto Obama ole kakomongei bokolushekab biik asi kotaach inendet.

Kikisikchini kokwonoto kwanitab Obama,noto amunee asi komitei barak kagenishet nebo toksenyi eng kokwonoto.

Mitei barak ripsetab kalyet eng komasatak bo Kogelo eng kasarta neyoei rutoito Obama eng komasatak.

Yeiwong rutoitonyi Obama eng eng emoni,ko tetat kotokchigei Obama emetab South Africa ole tetat kokon ngalalet eng tuiyet kila kenyit noto nebo Nelson Mandela Lecture ak kotuiyo kora ak  President nebo emonoto Cyril Ramaphosa.

Koit emoni Obama eng betutab amut eng rutoito nebo betushek 2 ole konyor tokset kobun Minister nebo tilianditab emotinwek chebo sang Amb Monica Juma eng kiwanjetab ndegeishek nebo JKIA kotomo kotokchigei State House,Nairobi ole koyai tuiyet ak President Uhuru Kenyatta.

Koyai kora tuiyet Obama ak kandoindetab Upinzani Raila Odinga ole kongalale tuguk cheterter cheboto katuiyetabgei nebo emet.