Suspected poachers arrested with 54kgs of ivory

Tuesday November 13, 2018 – Kanam ofisaekab Kenya Wildlife Services (KWS) eng Laikipia West kiplokotinik 5 chekakinyor kotindoi keleek 21 chebo beleek chebo kiloishek 54.7.

Kakinam biikchoto eng komwata nebo Mowarak kosupkei ak logoiyot kobun biikab emet.

Kamwa Deputy County Commissioner nebo Laikipia West Benard Munywoki kole kakinam biikchoto yekangonde mestet ofisaekab KWS akonam icheget yekangotetei kolaa keleekchatak kobwa taonitab Nairobi.

Kamwa Munywoki kole 3 eng biikchoto kakinam kobunu County nebo Samburu ole kimongu ko kokiibunen keleekchatak ak biik alak 2 ko kiyoni kele katoretishei eng loisetab keleekchatak.

Kerotin biikchoto 5 eng keteshetab Police nebo Rumuruti kogeni kiit kapkirwok yeiwongei chikilishet.

Kaikoito kateunet Munywoki eng biik chetinyegei ak lokeetab tiongikab timin kole kiipchini icheget kakwoutik chekimen.