Obado to spend another night in police custody

Thursday November 15, 2018 – Wendi kongetu kokerat eng ketesietab police nego Gigiri gavana nebo Migori Okoth Obado kogeni konai eng karon ankot koiyonjin kapkirwok police koker inendet eng kasartab betusiek 15.

Kabiit nito eng kasarta nekakiitita Obado eng taitab Chief Magistrate Joyce Gandani eng kapkirwok nebo Kibera kosupgei ak nekokinyor bundukisiek 8 eng goinyin Nairobi ak Migori.

Kasom kebeberta nebo prosecution kapkirwok kokochi police kasarta nebo betusiek 15 koker Obado asikotestai chikilisiet kotomo koyotyin ine kirwoket nebo bundukisiek chekokinyorji chemotindoi chomchinet.

Kosupgei ak noto ko kangat kapkirwok keker Obado eng ketesietab police nebo Gigiri agoi betutab karon kasitab mut ole wendi kokonu tilet kapkirwok ankot kochomchin police koker inendet eng kasarata bo betusiek 15.

Akot kou noto ko kamwochi kapkirwok Obado kobun ogilyondenyin Rojers Sagana kole bundukisiekchoto kokinyorji ine ko kokichikil kotindoi lesienisiek ak kou noto konyolu kityakta ine akot eng kasarta netesetai chikilisiet.

Konyor afisaekab segeisyet chebo EACC bundukisiekchoto eng kasarta nekoibokchi mengotetab Obado eng chikilisiet netesetai nebo poisiet neya nebo rabisiek silling billion 2 chebo Migori county.