Maraga responds to Kenyatta’s remarks on bail

Sunday December 16, 2018 – Betushek tutikin kongete ngorirtae President Uhuru Kenyatta kebeberta nebo kapkirwok anan Judiciary kotinygei ak neikoitoi Bail chengering eng biik chekirwokchini kotinygei ak asoya,ko kakowol Chief Justice David Maraga kotinygei ak noto.

Kamwa Maraga kole maiyanat kerirtae kapkirwok eng mwaet kole ikoitoi bail konamgei ak baornatet nekakikon eng kapkirwok kotinygei ak kirwogetab biikchoto.

Kongololi eng sautikab Jumapili chekatestai eng korkoretab Kamiti Maximum Security Prison, komwa Maraga kole tindoi imanda chitugul nebo kitiakta eng bail kobate tiegeei bail nekikoitoi ak baornatet nekikonu eng kapkirwok.

Kamwa Maraga kole akot ingandan tindoi maget kapkirwok nebo kotoret serkali eng poriet nekitokchini asoya,konyalu eng Director neindochini kirwogutikab poror anan DPP kokon baornatet neyomei kirwokchinee biik chekimuti kapkirwok kotinygei ak nametab asoya.

Komwa President Kenyatta yekongondochini igortab Jamhuri Day kole manyalu eng kapkirwok kotiakta biik chekirwokchini kotinygei ak asoya eng bail nemitei ingony.

Kosupkei ak Kenyatta,komanyalu kepoisie kapkirwok kewech poriet netesetai kotinygei ak asoya kobate nyalu eng kapkirwok kokoito kerkongiet nengwan eng biik chekirwokchini kotinygei ak asoya.