Bomet// HELB

January 17, 2019 – Katestai kurset eng bikab emoni chekinyor besendo nebo rabinikab somanet kobun kipakengeitab Higher Education Loans Board koker kole kaiwekta rabinichatak asiketoretee kipsomaninik alak chemokchinigei toretet nebo kotestai ak somanet eng sukulishekab barak

Kongololi eng kasarta nekoindeni siyet koyonchinetab kopois eng kipakenge ak serkalitab county nebo Bomet, ko komwa ofisayat neo eng kibagengeinoto bo HELB Charles Ringera kole akoi inguni kotomo kiwekta rabinik cheitei silingishek Billion 52 ole kamwa kole nyolu eng bik tugul chekikibesenchi rabinichatak kowekta eng chokchinet asiketoretee kipsomaninik chemokchinigei toretet.