Kasetab kirwogutik chebo asoya

Kakoyomis kapkirwok kochokchi kasetab kirwogutikchoto

Kakotes kebeberta nebo kapkirwok koitetab kirwogik chepoishei eng kapkirwok nebo Anti-Corruption Court asi kochokchi kasetab kirwogutik chetinyegei ak asoya

Kamwa Chief Justice David Maraga kole kakelewen kirwogik alak 10 chetesotin chebendi kopoishei eng kapkirwokinotok ole kakongat kora kirwogik tugul chebo Anti-Corruption Court kotes kasarta nebo kasetab kirwogutik chetinyegei ak asoya ak kochokchi kasetab kirwogutikchoto.

Kongololi kokebata tuiyet nekaiyum kirwogik cheechen kobun kapkirwok cheterter eng emet, komwa Justice Maraga kole kikochini konetishet kirwogik tugul chebo kapkirwok inotok bo Anti-Corruption Court kotinygei ak ortinwek chemagat kosub eng kasetab kirwogutikchoto asi kiwong eng chokchinet.

Kamwa Justice Maraga kole kirwoget age tugul netinyegei ak asoya komagat kegas ak ketil eng kasarta nemosirei arawek 5.

Tuiyonoto katestai eng kapkirwok nebo Milimali,ko kaiyum President nebo kapkirwok nebo Court of Appeal Justice William Ouko, Principal Judge nebo High Court Justice Lydia Achode ak kirwogik alak cheechen ole kakiyonchin kisuldae kakwoutik cheterter chetokchinigei kechokchi kasetab kirwogutik mising ko chebo asoya cheboto ketes kasarta nekikosei kirwogutikchoto.

Eng logoiyotab kipagenge nekasoman Justice Ouko,komitei kapkirwok kirwogutik cheitei 94 chetinyegei ak asoya chemagat kekas ak ketil eng chokchinet.

Kamwa Justice Ouko kole eng kwenutab arawetab 7 kenyitab 2017 ak arawetab 12 kenyit konye,ko kikikoito kirwogutik 91 chebo asoya koba kapkirwok ole kikikas ak ketil kirwogutik 46 eng choto.

Kosupkei ak noto ko tetat kondochi Justice Maraga tuiyet nebo National Council for Administration of Justice eng wikit nenyonei ole tetat kengalale kanangutik chekikoipchi kochuutgei kasetab kirwogutik chetinyegei ak asoya eng kapkirwok.

Kakiyai tuiyonoto eng kasarta nekokotestai kerirtae kebeberta nebo kapkirwok kotinygei ak nekikoek kanagut eng poriet nekitokchini asoya ole kokokimit Maraga kole manyalu kerirtae kapkirwok eng kasarta nekaitiakta biik chekakimwaitae asoya eng mwaet kole magat eng kebeberwek cheindochini chikilishet kokon baornatet neyomei kirwokchinee biikchoto.