Nurses strike: Government opts for dialogue

Friday February 15,2018 – Kakokoito kurset serkali eng kanyoik chenootin kou Nurses chebo emoni koweekchigei poishet eng kasarta netesetai ng’alalet kotinygei ak magutikwai.

Kabit nito eng kasarta nekongat President Uhuru Kenyatta kanyoikchoto koweekchigei poishet koitei sait oeng nebo karon eng betutab rani Friday anan keisto icheget eng poishet.

Kamwa Minister nebo Labor Ukurr Yattani kole nyalu eng Nurses ichoto kokonyit ngatutietab kapkirwok nekingat icheget koweekchigei poishet asi kotestai ngalalet netokchinigei keisto terchinet nemitei.

Kongololi eng taonitab Nairobi,komwa Yattani kole kokowektagei kapkirwok kipagengeitab Council of Governors ak Ministry nebo tililindo komochei keipchi kerkongiet Nurses kosupkei ak nemakonyit ngatutietab kapkirwok ole tetat kekas kirwogonoto eng betutab Jumatatu.

Kamwa Yattani kole tesetai ak tuiyoshekab ngalalet Committee nekikitoi asi kocheng walutiet kotinygei ak rireekab Nurses ole tetat koyai tuiyet neo eng betutab mutai Jumamos neiyumi ofisaek kobun kipagengeitab SRC,Council of Governors ak Ministry nebo tililindo eng tokchinetab kenyor walutiet kotinygei ak strike inoto bo Nurses.