Kiyote raini sukulisiek tugul chebo Primary

Kiyote eng raini sukulisiek tugul chebo Primary ak sekondari eng emet ole wekchingei kipsomaninik sukul kokaibata kamunget nebo arawek oeng’.

Kosupgei ak calendar nebo ministry nebo somanet ko kakiyat raini sukulisiek ak tetat keker eng tarikit 10 arawetab 4 ne noto ko makat komitei kipsomaninik eng sukul eng kasartab wikisiek 14.

Kimongu kobiit chiletabgei eng ketesiosiek chebo matatu eng emet kosupgei ak neweksei kipsomaninikchoto sukul.

Bitu nito eng kasarta nekoikoito kateunet eng konegit minister nebo somanet Prof. George Magoha eng konetik cheechen chebo sukulisiekab sekondari kotinygei ak tesetab rabisiekab school fees eng mwaet kole maiyanat ago kiipchin kokwoutik konetindet agetukul neo nekinyoru kokates school fees.