Tetat kirwokchi MP nebo Gatundu South Moses Kuria raini

Tetat kirwokchi MP nebo Gatundu South Moses Kuria eng betutab raini kotinygei ak lelutiet nemwaat kele kiibokchi ak kopir kwony 1 eng taonitab Nairobi.

Kabit nito eng kasarta nekasom Kuria kapkirwok koyapta kasetab kirwogenyi ole kaesio somenyi kirwogindet Justice Martha Mutuku.

Kamochei Kuria kitonon komatkirwokchi inendet kotinygei ak lelutionoto eng mwaet kole mitei somet age nekoikoito eng kapkirwok konerekchini kakwoutiet nekoib police koesio kotiakta inendet akot eng kasarta nekingat kapkirwok kole kitiakta inendet eng bail.

Kobun ogilionyi John Khaminwa, ko kamach Kuria komatkirwokchi inendet akoi kekas somonoto kobate kaesio kapkirwok.

Akot kou noto ko tetat kesomonchi Kuria lelutik asi koesio anan koiyan lelutikchoto.