Kekesom Konetik komatkomanda eng’ North Eastern

Kakosom Minister nebo somanet Prof George Magoha konetik chebunu sang nebo North Eastern komatkomanda eng komasatak kosupkei ak kabokchinoshek cheisuldoen chelesoshekab Al-Shabab.

Kabit nito kosupkei ak nekokon kateunet konetikchoto kole bendi koistoigei eng komasatak bo North Eastern kosupkei ak baretab konetik 3 eng kabokchinoshekchoto.

Kongololchini siriikab logoiywek eng sukulitab weriik nebo Machakos Boys, koyomis Magoha kole yoei kit age tugul serkali kogeer kole kakiriib kalyet ak chametabgei nebo konetik cheinetishei eng komasta nebo North Eastern.

Kasom Magoha mengikab North Eastern kotoretgei ak serkali eng ripsetab konetik ole kacheer icheget ko’ngong chelesoshek chemitei kwenungwai asi keipchi kakwoutikab kerkongiet.

Koikoito kurset eng betutab amut sirindet neo nebo KNUT Wilson Sossion eng Magoha kogur tuiyet ak ofisaek kobun Ministry nebo ripsetab kalyet eng emet orit koboto kipagengeitab TSC asi kecheng walutiet kotinygei ak kaimutionoto eng mwaet kole chobot KNUT koisto konetik eng komasatak bo North Eastern angotkomakirib kalyetab konetikchoto.