Matindoi miondab Coronavirus biik 3 chekait emoni eng karonetab rani kongete emetab China

Matindoi miondab Coronavirus biik 3 chekait emoni eng karonetab rani kongete emetab China.

Nito ko kosupkei ak chikilishetab kanyoiset nekakiyochi biikchoto.

Kamwa serkali kobun Ministry nebo kanyoiset kole kiibei korotiikab biikchoto koba emetab South Africa asi kotakeyochi chikilishet nebo barak kotomo keib kakwoutik alak cherubei.

Kakitaban biik 2 eng sipitalitab poror nebo Kenyatta kasarta nenuach kokait kiwanjetab ndegeishek nebo JKIA kongete China asi kechigil kosupkei ak nekaoo maat eng borto.

Kakitaban kora chi age eng sipitalitab Coast General Hospital,Mombasa yekangoit emoni kongete China kosupkei ak nekatindoi kaborunoikab mionoto bo Coronavirus.

Kaikoito kurset Ministry nebo kanyoiset eng biikab emet komatkosich kaiyweishet age tugul kobate koib kakwoutietab koba sipitali yenyor kaborunoik chekergei ak chebo mionoto bo Coronavirus.

Kokobar mionoto biik chesirei 304 akonam biik alak chesirei 14,500 kongete ngotoigei eng komasta nebo Wuhan eng emetab China.

Kokoletagei mionoto eng emotinwek 24 cheboto emetab Hong Kong, Australia, Cambodia, India, Japan, Macau, Malaysia, Nepal, Philippines, Singapore ak South Korea.