Kakobarasta President Uhuru Kenyatta betushek chebo rirek kongete betutab rani

Kakobarasta President Uhuru Kenyatta betushek chebo rirek kongete betutab rani akoi betut nekikonori bortab neki President nebo emoni Daniel Moi nekaibet sobenyi eng karonetab rani.

Kamwa President Kenyatta eng logoiyot ne inegei anan Presidential Preclamation kole tetat kora kinde benderok nusu anan half-mast eng korik tugul chebo serkali cheboto State House ak kampishek tugul chebo asikarikab luget chebo Kenya Defence Forces ak eng kapkiyok tugul chebo emoni eng emotinwekab sang.

Kaibarasta kora kandoindetab emet kole tetat kikochi Arap Moi konoret ne inegei anan State Funeral konamgei ak kondit nekikochini bik chekikondochi emoni ko President.

Kasirto boiyot Arap Moi kobo kenyishek 95 eng karonetab rani eng sipitalitab Nairobi Hospital ole kamwa President Kenyatta kole kasirto inendet eng taban nebo membaek chebo family nenyindet.

Kaiyokto President Kenyatta logoiyotab mutyo koityi family ak chamanik chebo Arap Moi eng mwaet kole kakobet emetab Kenya 1 eng kandoik che nootin missing chekiib borotet ak bandaptai nebo emet.

Kiindochi Moi emoni ko President eng kasarta nebo kenyishek 24 yekingobet sobenyi President netai nebo emoni Jomo Kenyatta eng kenyitab 1978.

Eng kasaratak ko kakomwa Senator nebo Baringo county Gideon Moi ne inendet ko weritab Arap Moi kole kasirto kwaninyi eng sait 5.20 AM nebo karonetab rani
Kongololchini inendet sirikab logoiwek eng sang nebo sipitalitab Nairobi Hospital ole kabotogei ak Chief of Defence Forces Gen. Samson Mwathethe ak Minister nebo ribetab kalyet eng emet orit Dr. Fred Matiangi.

Kinaak missing Moi kotinygei ak kandoinatenyi nekiib kelchin neo eng bikab emet eng sectors cheboto somanet, ribetab kalyet ak tililindo eng kwenutab poishonik alak chekiityi komonut.

Kiikoito bounotet inendet eng President nebo 3 nebo emoni Mwai Kibaki eng kenyitab 2002 olekipoishek kasaratak kokon ngalalenyi nekinaak missing yekingomwa kole kikonyochi gat chi age tugul nekilelchi inendet ak kosomei nyoetabgat angot ko kikolelchi chi age tugul.

Kakebi bortonyi kowo kot nekikonoree muswek nebo Lee Funeral nemitei sipitalitab Nairobi Hospital ole tesetai koititoi komasatak kandoikab emoni asikokoito logoiyongwai nebo mutyo eng family nebo Arap Moi.