Imuch koweek let emoni eng kakwoutik chekikoib eng kirindaetab miondab Ukimwi

Kakokon kateunet kipagengeitab National Aids Control Council kole imuch koweek let emoni eng kakwoutik chekikoib eng kirindaetab miondab Ukimwi agotkomates serkali chepkondok chekipoisie eng katerteretab mionoto.

Kamwa kipagengeinatak kole kokochuchuch kipagengeishekab toretet rabinik chetoreten emoni eng kirindaetab Ukimwi kongete kebeberta 90% akoi kebeberta 60% kit neimuchi kowech katerteretab mionoto.

Kosupkei ak Deputy Director nebo HIV and Investment eng kipagengeinatak Regina Ombam, ko kikotiegeei emoni rabinikab toretet eng kasarta nekoi ak kou noto ko kakoit kasarta kotaban chepkondok chekikirindoen mionoto bo Ukimwi.

Kosupkei ak Ombam, ko kokoreek kanaamdaetabgei nebo kutiikab HIV eng emoni kongete kebeberta 5.6% akoi kebeberta 4.9% eng kasarta nebo kenyishek 5 chekikosirto.

Kangololi Ombam eng tuiyet 1 nekakingololen kanyoiset eng Naivasha ole kacheer Counties kokimit tetutik chebo kirindaetab miondab Ukimwi