Kokowechok Mung’aret akobo Corona Virus

Kakesom bikab emoni ak chemungarainik chekokowechokis mungaroshekwai kosupgei ak kokwoutyet nekokiib kitonon rutoiwek chebo 1 eng 1 kongete emetab China komuita amu kokwoutionotok kotokchinigei kekirinda miondo ne ngoi missing nebo Corona Virus komatkochut emoni.

Kamwa Minister nelel nebo mungaret Betty Maina kole tesetai serkali kochengei oret nekitoretee chemungarainichatak konyor tugukwai chebo mungaret chekocham konyoru kobun emetab China ak kou notok ko nyolu komuita.

Kongololi eng kasarta nekatou poishet eng ofisinyi nelel nemitei gotab NSSF eng taonitab Nairobi, ko kamwa Maina kole bunei emoni kasarta nebo bichiindo kosupgei ak mionotok bo Corona Virus ak kou notok ko nyolu kikochi serkali kasarta nebo kokirinda mionotok komatkoit emetab Kenya.

Kates komwa inendet kole kokekanapta chigilishet eng komaswek tugul chekichutune emoni eng tokchinetab kekirinda mionotok.

Akoi inguni ko kokobet sobonwekwai bik chesirei 3,000 eng emotinwek cheterter chebo ingony kotinygei ak mionotok kitoigei eng komasta nebo Wuhan eng emetab China.