Chobetab Wardit nekitobonen biik chekinyorchini miondab Corona Virus

Kiwongu eng betutab rani chobetab Wardit nekitobonen biik chekinyorchini miondab Corona Virus ndawendi atkochut emoni eng sipitalitab Mbagathi Hospital.

Nito ko kosupkei ak Minister nebo kanyoiset Mutahi Kagwe nekamwa kole chobot serkali koterter mionoto ole kokoib kakwoutik chemokotin.

Kongololi eng tuiyet nekayai ak Committee nebo kanyoiset eng Council of Governors kotinygei ak kakwoutik chekokoib serkalishekab Counties eng kirindaetab mionoto,komwa Kagwe kole kokekanapta tetutikab kanyoiset eng sipitalishekab Level Five ak Referral hospitals eng emet eng kanyoiset ak katabanetab biik chekinyorchini mionoto.

Kacheer Kagwe biikab emoni kokanapta tililindo ak kouun eunekwai eng kasarta age tugul asi kobit keteer mionoto.

Kamitei tuiyonoto CEC’s chebo tililindo kobun Counties tugul chebo emoni chekaiaror kakwoutik chekokoib Counties chekwai eng kirindaetab mionoto bo Corona Virus.
Kakilumda eng tuiyonoto Committee newendi kondochini tetutik chebo kirindaetab mionoto eng Counties nenaat kou County Emergency Response Committee on Coronavirus neiyumi Governor kou nebo ngecheret ak County Commissioner kou rubeiywotab nebo ngecheret.

Kabit nito eng kasarta nekamwa Minister nebo loiset James Macharia kole tesetai serkali kochigili emotinwek chekokoitchi mionoto eng tokchinetab kitonon panwekab ndegeishek kongete emotinwekchoto akoi emoni.