Chobot serkali kokirinda kabokchinoshek alak tugul

Kakomwa Minister nebo ripsetab kalyet eng emet orit Dr. Fred Matiangi kole chobot serkali kokirinda kabokchinoshek alak tugul che imuchi kosuldae chelesoshek chebo kipakengeitab Al-Shabab eng emoni.

Kamwa Matiangi kole manyalu eng biikab emet kosich kaiyweishet age tugul amu kokenapta ripsetab kalyet eng emet.

Kongololi yekangoyai rutoito nemobo kotugul eng kotab mungaret nebo Thika Road Mall eng taonitab Nairobi asi kochigil oleu tetutik chebo ribetab kalyet eng koyotok kiolishee, komwa Matiangi kole kokeyokto ribiikab kalyet koba komaswek tugul chebo emet asi koriib kalyet.

Kabit nito eng kasarta nekokon kateunet kapkiyook nebo emetab America eng emoni kole mitei kamugetab kosuldae chelesoshekab Al-Shabab kabokchinoshek eng taonitab Nairobi ole kamwa Matiangi chobot serkali kokirinda kabokchinoshekchoto.

Kabotogei Matiangi ak Inspector-General nebo Police Hilary Mutyambai nekaiyomisyi biikab emoni kole ribotin icheget ole kasom icheget kopois ak police eng tetutik chebo ripsetab kalyet.