Kakitonon kongelelchinetab poishet neka tetat kotoi konyoik

Kakitonon kongelelchinetab poishet neka tetat kotoi konyoik eng betutab rani
Katil kipakengeishekab konyoichotok koyapta kongelelchinet notok bo poishet eng kasarta nebo 21 asikoyai ngalalet ak serkali kotinygei ak mogutik chemochei icheget kisuldochine.

Kamwa sirindet neo eng kipakengeitab konyoik nebo Kenya National Union of Nurses Seth Panyako kole angot kobek betushechotok 21 komoityi koshinet ak serkali, kobendi kotesetai icheget ak kongelelchinetab poishet akoi kekoshi rirekwai.

Alak eng mogutik chekokon konyoichotok ko kikochi konyoik chetinyegei ak konyoisetab Covid 19 allowances chekergei ak chekikochini daktarishek eng mwaet kole bunei ngoiyondit nekergei ak daktarishek eng kasarta netesetai ak poishonikab koker kole kakinya ak kerib bik chetinyei miondab Corona Virus.

Mochei kora konyoichotok kikochi konyoik tugul tuguk chepoishe asikomuch kotergei komanam miondab Covid 19 ole mochei kora kekochi katororet anan promotion membaekwai, missing ko chepoishechini serkali neo nebo national government.

Eng kasaratak ko kamwa sirindet neo eng kipakengeitab Kenya Union of Clinical Officers George Gibore kole nyolu eng serkali koiityi komonut mogutik chekokon kipakengeishekab konyoik amu yoei icheget poishonik chebo komonut missing eng boryet nekitokchini mionotok bo Corona.