Matindoi kamugetab counties koterter miondab coronavirus – Oparanya

Kakokon kateunet Governors chebo emoni kole matindoi kamuget Counties nebo koborie ak koterter miondab Corona.

Kamwa nebo ngecheret eng Council of Governors Wycliffe Oparanya kole ingandan ikiligei serkalishekab County kokirinda mionoto eng Counties, komatindoi icheek rabinik chepoisien eng tetutik chebo kirindaetab mionoto.

Kosupkei ak noto komwa Oparanya kole nyalu eng serkalit neo kotoi laboratories chekipimonen miondab Corona eng sipitalishekab Level 4 eng emet asi kimuch keteer mionoto.

Kongololi eng County nebo Kisumu, komwa Oparanya kole maisuldoi poriet neketokchin mionoto eng Counties angotkomaitiakta serkali chepkondok koitchi serkalishetab County.

Kamwa Oparanya kole igeni Counties kitiookchi silingishek Billion 5 chekimwa President Uhuru Kenyatta kole kikochini Counties asi kopoisie eng kirindaetab mionoto bo Corona.

Akot kou noto komwa Oparanya kole tesetai icheek ak tetutik chebo kirindaetab mionoto asi maletagei akoi kokwotinweek.