Kokotoi serkali kosuldae arorutik kanyoisetab covid-19

Kokotoi serkali kosuldae arorutik chelelach chebo kanyoiset ak kirindaetab miondab Corona chekoimoong kipagengeitab World Health Organization (WHO).

Eng arorutikchoto lelach, ko kimuchi kitiakta biik chetinyei mionoto chekokotar betushek 14 eng Quarantine koba gaa asi keriib kosupkei ak nemakomuchi konaamda biik alak.

Kosupkei ak Dr. Patrick Amoth kobun Ministry nebo kanyoiset, kotesetai kasuldaetab arorutikchoto eng chopchinetabgei nebo kitiakta biik alak asi keriib ak kinya eng gaa kosupkei netesetai kolonyei koitetab biik chekenyorchin mionoto eng emet ole makomitei poroindo nebo kinya biikchoto eng sipitali.

Kamwa kora Dr. Amoth kole tesetai konetishet eng kanyoik kotinygei ak ole kiriiptoi biikchoto eng gaa kotomo kotoigei tetutionoto.

Biik chekitioktoi asi keriib eng gaa ko biik chekinyorchin miondab Corona kobate maiboru kaborunoik alak tugul.