Gideon Moi akobo katuiyetabgei nebo OKA

Kakokoito kurset kandoindet nebo chamaitab Kanu Gideon Moi eng kandoik kobun Central Kenya kochut katuiyetabgei nebo One Kenya Alliance.

Kongololi eng kanisetab AIPCA Church nemitei Chaka eng Nyeri County eng kaumanik chebo teksetab kaniset, komwa Gideon Moi kole tindoi maget katuiyonoto nebo koib walet eng emoni, ak kou noto kotogotin kandoikab Central Kenya kochut katuiyonoto asi kopois tugul eng kipagenge eng ibunetab bandaptai.

Kasom Senator Moi mengikab Mount Kenya kotoret President Uhuru Kenyatta akoi kowong kandoinatenyi, eng mwaet kole kikoyai poisionik chechang serkalitab Jubilee eng komaswek tugul chebo emoni, ole kasom biikab emoni komengis eng kalyet ak kipagenge eng kasari tokchinigei emet lewenisiet.

Kabotogei Senator Moi ak kandoik cheboto County MP nebo Baringo Gladwell Cheruiyot, MP nebo Kieni Kanini Kega ak Governor nebo Nyeri Mutahi Kahiga, ole kamwa Kega kole tomo kotil kebeberta nebo Mt. Kenya chito nepirchin kura eng ngecheretab president eng lewenisiet neo nenyonei, kobate kamwa kole togotin biik tugul chesomei kura eng komasatak bo Mt. Kenya.