RUTO: Wendi inendet kopoisiei ak kandoik tugul

Kakomwa Deputy President William Ruto kole wendi kopoisie ak kandoik che indeni tai magutik chebo biikab emet kosiir magutikwai eng chopchinetabgei nebo lewenisiet neo nenyonei.

Kamwa Ruto kole chobot kopois ak kandoik chetindoi kereet neu nenyi eng kasuldaetab tetutiet nebo Bottom-Up-Approach netokchinigei kokanapta sobonwek chebo biik chemitei ingony ama kopois ak kandoik chemochei kepchei poroinwekab kandoinatet.

Kongololi eng igorta nebo kawektaetab kongoi kosupkei ak lewenetab MCA nebo Rurii Francis Muraya nekakiyai eng kiwanjetab Rurii stadium eng Nyandarua County, korirtae Ruto kandoikab Nasa kotinygei ak kaimutik chemitei serkali, eng mwaet kole kiyai kobeet tokchinet serkalitab Jubilee eng kasuldaetab tetutik chebo Big 4 Agenda.

 

Kabotogei Ruto ak MPs chesirei 40 cheboto Kimani Ichungwa (Kikuyu), Ndindi Nyoro (Kiharu), Alice Wahome (Kandara) ak alak chekamwa kole manyalu kewal betutab lewenisiet, ole karirtae nametab kandoik cheboto MP nebo Mathira Rigathi Gachagua kosupkei ak neikochini kasubet William Ruto.